काठमाडौं । अमेरिकाको कानूनी प्रावधान विपरीत जहाज खरिद बिक्रीमा विदेशीलाई घुस खुवाउने प्रतिवादीमाथि साढे पाँच करोड डलर जरिवाना हुने भएको छ । अमेरिकाको न्याय विभागले जारी गरेको सूचनाअनुसार एएआर कर्प नामक कम्पनीले जरिवाना तिर्नुपर्ने भएको हो ।
नेपाल र दक्षिण अफ्रिकाका जहाज खरिदकर्तालाई घुस खुवाएको भन्दै पब्लिक ट्रेडिङमा जोडिएको यो कम्पनीले जरिवाना तिर्नुपर्ने भएको हो । सन् २०१५ बाट सन २०२० सम्म नेपाल र दक्षिण अफ्रिकाका हवाई सेवा प्रदायकलाई घुससहित जहाज बिक्री गरेको आरोप लागेको कम्पनीले त्यो दुई देशको प्याकेजबाट २ करोड ४० लाख अमेरिकी डलर नाफा कमाएको देखिएको छ ।
नेपालको नेपाल वायु सेवा निगमको लागि खरिद गरिएको ए३३३–२०० मोडेलका दुई जहाज र अफ्रिकामा बिक्री गरिएका जहाजमा घुस खुवाइएको बताइएको छ । नेपाली सरकारी हवाई सेवा प्रदायकको खरिदमा नेपाली अधिकारीलाई विभिन्न माध्यमबाट घुस खुवाइएको बताइएको छ । तर, कुन कुन अधिकारीले कति कति घुस लिए भन्ने खुलाइएको छैन ।
