सबै सरकारी सेवा एउटै एपबाट दिने उद्देश्यका साथ तयार पारिएको नागरिक एपमा नयाँ अपडेट आएको छ । नागरिक एपको पछिल्लो अपडेट सँगै प्रेस पास लिङ्क गर्न सकिने सुविधा र वैदेशिक अध्ययन अनुमतिपत्र (नो अब्जेक्सन लेटर)का लागि आवेदन दिन सकिने सुविधा आएको छ ।
सूचना तथा प्रसारण विभागले जारी गर्ने पत्रकार परिचयपत्र (प्रेस पास) लिङ्क गर्न सकिने सुविधा समेत नयाँ अपडेटसँगै थप भएको छ । हाललाई आफ्नो विवरण हेर्न सकिने सुविधा मात्रै रहेकोमा एपको अर्को अपडेटमा एपबाटै नयाँ प्रेस पास वा नवीकरणका लागि आवेदन दिन सकिने सुविधा समेत उपलब्ध हुने बताइएको छ ।
यति मात्र होइन, अहिलेलाई वैदेशिक अध्ययन अनुमतिपत्रका लागि आवेदन दिने र मन्त्रालयको वैदेशिक अध्ययन अनुमति शाखाबाट प्रक्रिया पुरा भए नभएको जानकारी नागरिक एपमा हेर्न सकिन्छ । प्रक्रिया पूरा भएको खण्डमा उल्लेख गरिएको बैंक खातामा रकम जम्मा गर्नुपर्ने हुन्छ । नागरिक एपको आगामी अपडेटमा अनलाइनबाटै एनओसीको शुल्क तिर्न सकिने सुविधा समेत आउदै छ ।
अर्को अपडेट एकहप्ता सम्ममा उपलब्ध गराउने तयारी रहेको छ ।
